أقرب محطة مترو لاستاد القاهرة
أقرب محطة مترو لاستاد القاهرة موجودة في الخط الثالث الجديد وهي محطة الاستاد، وممكن تتمشى منها للاستاد في دقيقتين أو 3 بس لإنها على بعد 500 متر فقط عن الاستاد، وإذا كنت خايف من الزحمة فممكن تنزل في محطة أرض المعارض اللي بعد الاستاد وهي على بعد 850 متر فقط يعني 5 دقائق مشي.
في هذا المقال
إزاي تنزل في أقرب محطة مترو لاستاد القاهرة
عنوان استاد القاهرة
خريطة بوابات استاد القاهرة
مواصلات استاد القاهرة
.png)
إزاي تنزل في أقرب محطة مترو لاستاد القاهرة
بما إن فيه 3 خطوط لمترو الأنفاق فإنت لو راكب الخط الأول أو الثاني فهتحتاج تنزل في محطة تبادلية، وفيه أكتر من محطة تبادلية في المترو وهم:
· محطة أنور السادات أو التحرير ودي تبادلية بين الخطين الأول والثاني.
· محطة الشهداء أو رمسيس ودي برضه تبادلية بين الخطين الأول والثاني.
· محطة العتبة ودي تبادلية بين الخطين الثاني والثالث.
· محطة جمال عبد الناصر ودي تبادلية بين الخطين الأول والثالث.
وغالبا هيكون سعر التذكرة من أي محطة مترو في الخطين الأول والثالث لمحطة الاستاد مش أكتر من 10 جنيهات.
كمان تقدر تركب مباشرة من أي محطة على الخط الثالث وساعتها سعر التذكرة مش هيزيد عن 5 جنيهات في سنة 2021، ومحطات الخط الثالث حتى الوقت ده هي:
نادي الشمس، الألف مسكن، ميدان هليوبوليس، هارون، الأهرام، كلية البنات، استاد القاهرة، أرض المعارض، العباسية، عبده باشا، الجيش، باب الشعرية، العتبة.
ومن المخطط تأسيس 26 محطة تانية في الخط ده زي عدلي منصور وعمر بن الخطاب وقباء وهشام بركات وغيرها.
كيف أعرف أقرب محطة مترو لموقعي
مقالات ذات صلة
إيه هو عنوان استاد القاهرة بالظبط؟
استاد القاهرة موجود في منطقة مدينة نصر اللي بتقع شمال شرق القاهرة، وتم افتتاحه سنة 1960 في ذكرى ثورة يوليو واستمر بناؤه 3 سنوات وكانت تكلفته الإجمالية وقتها 3 مليون جنيه، وكان وقتها من أكبر الملاعب في أفريقيا والشرق الأوسط.
وهو الاستاد الرسمي للمنتخب المصري وحصلت عليه مجموعة كبيرة من التطويرات في سنة 2005 بحيث إنه يناسب المعايير الأوليمبية الحديثة، واستاد القاهرة على بعد 10 كم بس من مطار القاهرة وبعيد عن وسط البلد بـ30 كم فقط، وطبعا خط المترو خلاه قريب من أي مكان في القاهرة الكبرى، وحتى المحافظات ممكن تنزل في رمسيس وتركب المترو وفي أقل من نص ساعة هتكون في الاستاد.
إيه خريطة بوابات استاد القاهرة؟
قبل ما تروح الاستاد لازم تعرف البوابات المختلفة وكيفية الدخول من كل بوابة ومكانها كمان وفيه 4 بوابات للدخول من الاستاد:
· البوابة الأولى هي الرئيسية دي موجودة في شارع ممدوح سالم وبيدخل منها اللي معاهم تذاكر درجة أولى.
· البوابة الثانية ودي على شارع يوسف عباس وبيدخل منها اللي معاهم تذاكر درجة ثانية.
· البوابة الثالثة على طريق النصر وبيدخل منها اللي معاهم تذكرة درجة ثالثة.
· وآخر بوابة موجودة برضه في شارع يوسف عباس وبيدخل منها اللي معاهد تذاكر درجة ثالثة شمال.
هل فيه مواصلات تانية للاستاد غير محطة المترو؟
طبعا أقرب محطة مترو لاستاد القاهرة هي فعليًا أسهل وأسرع وسيلة تقدر تروح بيها هناك، فمن أول محطة لحد الوصول مش هتاخد أكتر من ساعة وممكن أقل بكتير لو هتركب من محطات الخط التالت، ورغم كده فيه طبعًا مواصلات تانية غير المترو ومنها:
· أي مواصلات لميدان رابعة العدوية سواء من المرج أو رمسيس أو مصر الجديدة لإن الاستاد قريب جدًا من الميدان وممكن تتمشى 10 دقائق أو ربع ساعة على حسب البوابة اللي هتدخل منها.
· أي مواصلات إلى شارع مكرم عبيد زي ميكروباص من ميدان عبد المنعم رياض وده هيمرّ مباشرة قدام الاستاد.
· ممكن من رمسيس تاخد ميكروباص مباشرة لحد الاستاد.
· لو أي مواصلة رايحة عباس العقاد زي الموجودة في السيدة عائشة ده برضه بيمر على الاستاد.
· ممكن تاخد ميكروباص رايح لموقف العاشر بس عن طريق صلاح سالم وده هيمر على أكتر من بوابة للاستاد.
وبعد لما عرفت أقرب محطة مترو لاستاد القاهرة لازم تعرف إن طبعًا قبل المباريات المهمة بتكون الدنيا زحمة علشان كده لازم تحاول توصل بدري 3 أو 4 ساعات على الأقل وهتلاقي جوة الاستاد لافتات إرشادية للمشجعين وحتى برّة الاستاد.