مواصلات القرية الذكية

مواصلات القرية الذكية متنوعة جدًا ومن أماكن كتيرة على مستوى القاهرة، فسواء عايز تركب من رمسيس أو الجيزة أو المعادي أو الهرم أو حتى مدينة نصر فهتلاقي أكتر من طريقة مضمونة وسهلة للوصول.

والقرية الذكية واحدة من أهم المدن الحديثة في مصر وحول القاهرة الكبرى، وبتضم لحد سنة 2021 أكثر من 1300 شركة متنوعة بين المصرية والعالمية والحكومية، وهي من ضمن المجتمعات اللي تم تأسيسها لجذب الاستثمارات إلى مصر، وموجود فيها مجموعة قوية من المرافق الحيوية لخدمة الشركات دي، فسواء كنت رايح زيارة أو شغل فإن مواصلات القرية الذكية سهلة ومش متعبة على الإطلاق.

 

إيه هو عنوان القرية الذكية؟

القرية الذكية مدينة كبيرة جدًا على 663 فدان لكن المساحات الخضراء فيها أكتر من 80%، وعنوانها بالظبط على طريق القاهرة الإسكندرية الصحراوي في الكيلو 28 قبل بوابات التحصيل اللي بين القاهرة وإسكندرية، ومن أهم الشركات الموجودة فيها لينك نت ونوكيا ومجموعة طلال أبو غزالة وشركة دار الهندسة ومايكروسوفت مصر وهواوي وسامسونج.

بالإضافة لهيئات متنوعة زي اتحاد البرمجيات المصرية والجهاز القومي لتنظيم الاتصالات ووزارة الاتصالات وتكنولوجيا المعلومات وجهاز حماية المستهلك وهيئة الإسعاف المصرية وغيرها كتير، علشان كده مواصلاتها متوفرة جدًا من أماكن كتير لإنها فعليًا بقت وجهة رئيسية لكتير من الناس سواء العاملين أو عملاء الشركات أو المواطنين اللي عايزين خدمات من الهيئات دي.

 

مقالات ذات صلة

 

مواصلات  القرية الذكية  من الهرم 

مواصلات من مطار القاهرة إلى رمسيس

مواصلات التجمع الخامس من رمسيس

مواصلات كايرو فيستيفال من رمسيس

مواصلات  العاصمة الإدارية 

مواصلات القرية الذكية من رمسيس

رمسيس من أشهر الميادين في القاهرة ومجمع حيوي جدًا للمواصلات ممكن منه تروح لأي مكان ومنه القرية الذكية، ومن أهم مواصلات القرية الذكية من رمسيس:

·         ميكروباص من الموقف الموجود خلف قسم الأزبكية وتنزل في الهرم، ومن هناك ممكن تركب عربيات الحصري أو ميكروباصات الهايبر وهتنزل منها عند سلم الصحراوي وهناك هتلاقي موقف كبير جدًا فيه عربيا بتوصل لك لحد بوابة القرية الذكية.

·         ومن رمسيس برضه ممكن تركب المترو وتنزل عند محطة جمال عبد الناصر ومن هناك فيه عربيات كتير متجهة لأكتوبر وتنزل برضه عند سلم الصحراوي وتركب أي عربية من هناك.

·         وممكن برضه تركب محطة الشهداء وتكمل لحد الجيزة وتركب أي عربية من موقف الحصري لحد سلم الصحراوي.

·         ومن رمسيس ممكن تركب حاجة لموقف عبد المنم رياض ومنه تركب أي ميكروباص لأكتوبر وتنزل عند سلم الصحراوي اللي بيعتبر أساسي لأي مواصلات رايحة القرية الذكية إنها تعدي من عليه.

 

والمسافة تقريبًا من القريبة الذكية لرمسيس هتاخد ساعة ونص أو ساعتين بالكتير لو الميدان زحمة وده لإن معظم الطرق اللي هتعدي عليها طرق سريعة طالما خرجت من ميدان رمسيس.

 

مواصلات القرية الذكية من الهرم

الهرم من المناطق القريبة جدًا من القرية الذكية وممكن تركب مواصلة واحدة بس أو اثنين بالكتير، وممكن تكون هناك في خلال ربع أو نص ساعة، ومن أهم المواصلات بين الهرم والقرية الذكية:

·         أتوبيس رقم 12 وده هتنزل منه في موقف 28 وبعدين تدوّر على عربية من الموجودة قرب ميدان الرماية ودي هتنزل منها عند باب القرية الذكية مباشرة.

·         من أول فيصل ممكن تركب أي ميكروباص متجه إلى أبو رواش ودي بتوصل برضه مباشرة للقرية الذكية بعد المرور على أبو رواش وكارفور.

·         من موقف المريوطية الموجود في الهرم ممكن تركب أي ميكروباص من أسفل الكوبري وبرضه تتجه مباشرة للقرية الذكية في 15 دقيقة تقريبًا.

 

مواصلات القرية الذكية من مدينة نصر

من مدينة نصر فيه مواصلة واحدة بس إلى القرية الذكية وهي أي ميكروباص بيروح المريوطية، وهتركبه لحد موقف 28 ومن هناك هناك أي ميكروباص بيروح القرية الذكية مباشرة، والطريق ممكن ياخد ساعة واحدة بس من مدينة نصر.

 

وبعد لما عرفت إيه هي مواصلات القرية الذكية لازم تاخد بالك إن لازم هتاخد تاكسي جوّة القرية نفسها لإن مساحتها كبيرة جدا علشان تبقى عامل حسابك في الوقت وفي الفلوس كمان لإن التمشية هناك هتكون صعبة شوية لإن مساحات الحدائق ضخمة جدًا فلو عايز شركة معينة لازم تكون عارف مكانها بالظبط جوّة القرية قبل ما تروح وتكون واخد اللوكيشن كمان لو أمكن، وعمومًا سعر التاكسي جوّة موحد بـ5 جنيه فقط، ولو المكان اللي إنت رايحه جنب البوابات ممكن تتمشاها عادي في 10 دقائق.