مواصلات من مطار القاهرة إلى رمسيس
ناس كتير متعرفش إن فيه مواصلات من مطار القاهرة إلى رمسيس متنوعة جدًا، يعني سواء كنت جاي من السفر بشنط خفيفة أو كنت بتودَّع حد ورحتوا بتاكسي وعايز ترجع بطريقة أرخص ففيه مواصلات نقل عام وميني باصات وكمان ميكروباصات من مطار القاهرة.
أتوبيس المطار
وده أول حاجة بتطلع بيها من المطار لحد موقف أتوبيسات هتلاقي فيه ميني باصات وأتوبيسات للمحافظات وأتوبيسات هيئة نقل عام وطبعًا ميكروباصات وغيرها، فلو إنت داخل المطار اسأل على مكان الأتوبيس ده لإنه بيوفر لك مجهود كتير قوي، وبعدين هنعرف مع بعض تركب إيه بعد كده.
مواصلات من مطار القاهرة إلى رمسيس ميني باص
لو عايز ميني باص مكيّف وفيه واي فاي وخدمة شحن الموبايل وكمان الميني باص مش بياخد أكتر من عدد الكراسي الموجودة فيه يعني مش هتقف أبدًا لإن فيه عربيات كتير والميني باص بيطلع في مواعيد محددة حتى من غير ما يكون عدد المقاعد اكتمل فبنرشح لك بقوة ميني باص شركة مواصلات مصر.
وده خط جديد من موقف المطار لحد دوران شبرا والتذكرة بتاعته بـ5 جنيه فقط وبتطلع بشكل إلكتروني من ماكينة جنب السائق وبيقف في أي مكان بتشاور له عليه يعني مش لازم المحطات الرسمية زي أتوبيسات هيئة النقل العام.
وخط سيره من المطار وبعدين صلاح سالم ومساكن شيراتون ومبيخرجش من صلاح سالم، والكلية الحربية ونفق الثورة ونفق الكوربة، وعمارات العبور، والعباسية ورمسيس، وبعدين كوبري الليمون وينزل شارع الترعة لحد دوران شبرا وكل ده بـ5 جنيه وبس.
مواصلات من مطار القاهرة إلى رمسيس أتوبيسات هيئة النقل العام
فيه أكتر من خط أتوبيس هيئة النقل العام بيوصل لك من موقف المطار إلى رمسيس، بس طبعًا لازم هتستعين بأتوبيس المطار للوصول للموقف لإن سيارة الأجرة من جوّة المطار غالية إلى حد كبير، وخطوط الأتوبيس اللي من المطار لرمسيس هي:
· خط 104: وده أوله في بشتيل وبيعدي على مساكن المطار وكوبري أحمد عرابي والعجوزة وشارع رمسيس والإسعاف لحد العتبة (الجنينة).
· خط 356: وده بيبدأ من مطار القاهرة وبعدين عبد الحميد بدوي في مصر الجديدة، والحجاز، والأهرام، وروكسي، والعباسية، ورمسيس، وعبد المنعم رياض.
· خط 366: وده مش بيوصل لحد رمسيس لكن بيعدي على حدائق القبة وميدان أحمد حلمي وممكن من هناك تركب أي ميكروباص لرمسيس، وخط سيره هو: مطار القاهرة، جسر السويس، حدائق القبة، الزاوية الحمراء، ميدان الخلفاوي، أحمد حلمي.
· خط 400: وده أوله مطار القاهرة وبعدين طريق المطار، سفير، عثمان بن عفان، روكسي، العباسية، عبد المنعم رياض، وممكن من العباسية أو عبد المنعم رياض تركب أي مواصلة لرمسيس سواء الميكروباص أو المترو.
· خط 949: وده بيبدأ من مطار القاهرة وبيعدي على أبو بكر الصديق وسفير وروكسي والعباسية والتحرير والدقي وجامعة القاهرة والجيزة، وتقدر تنزل في العباسية أو التحرير أو روكسي وتركب أي ميكروباص لرمسيس.
· خط 1036: وده بيبدأ من مطار القاهرة وبعدين ميدان الحجاز وشارع النزهة وميدان المحكمة وميدان روكسي والعباسية، وميدان عبد المنعم رياض، وتقدر في أي منطقة على الخط ده تنزل في أقرب مكان من موقف ميكروباصات أو أتوبيسات توصلك رمسيس.
· خط 1054: وده أوله في مطار القاهرة وآخره في أحمد حلمي وبيعدي على ميدان الحجاز وميدان التجنيد والمطرية والسواح، وشارع ترعة الإسماعيلية وعبود وفي الآخر أحمد حلمي.
· خط 1138: وده بيوصل لك مباشرة من المطار إلى رمسيس، فبعد المطار بيعدي على صلاح سالم والعباسية ورمسيس، ونفق التعاون والترعة البولاقية وشبرا والمظلات.
مواصلات من مطار القاهرة إلى رمسيس بالمترو
كان من المتوقع مدّ خط المترو الثالث من محطة عدلي منصور إلى المطار وده لحد سنة 2020، ولكن في شهر يوليو تم تعديل الخطة وإلغاء مد الخط الثالث للمطار وتغيير مساره واستبداله بخطوط شاتل باص، وده لتخفيض التكلفة بنسبة 70%.
وأتوبيسات شاتل باص ممكن تاخدها مباشرة من المطار وتوصل لك علطول إلى محطة مترو عدلي منصور ومنها تقدر تنزل في محطة رمسيس أو اسمها محطة الشهداء وسابقًا محطة حسني مبارك.
وفي النهاية بنتمنى إننا نكون قدمنا لك معلومات مفيدة ووافية عن المواصلات من مطار القاهرة إلى رمسيس، وعمومًا فإنك من موقف المطار ممكن تركب أي أتوبيس بيوصل لأي محطة مترو وساعتها ممكن بسهولة جدًا توصل رمسيس.
مواصلات التجمع الخامس من رمسيس
مقالات ذات صلة
مواصلات من مطار القاهرة إلى رمسيس
