أكيد سمعت عن الهجرة العشوائية لأمريكا، اللي معروفة باللوتري.
واللوتري بتتيح لك أنك تحصل على الجرين كارد يعني الإقامة في أمريكا وتهاجر وتعيش هناك كمواطن أمريكي، وده عن طريق التقديم في قرعه محددة الفائزين فيها هيتمتعوا بالمميزات دي.
أي شخص يقدر يقدم
هتسأل وتقول اللوتري دي أي حد يقدر يقدم فيها، والإجابة أيوه أي حد يقدر يقدم بعد إنجاز مجموعة خطوات بسيطة هنشرحهالك النهاردة ببساطة.
أزاي وفين أقدم؟
في الفقرة دي هنتكلم عن بعض النقاط المهمة في التقديم ونشرح بالتفصيل كيفيه التقديم
أولا: لازم تعرف من اسمها كده يعني مفيش فيها واسطة.. الموضوع كله بيرجع للحظ فأنت وحظك بقى.
ثانيًا: مش محتاج لا تنزل ولا تروح ولا تشتري استمارات، التقديم بيتم عن طريق الموقع ده بكل بساطة https://dvlottery.state.gov
ثالثًا: هما ١٤ سؤال بس اللي محتاج تجاوبهم، فتأكد من أن كل بياناتك تم إدخالها بشكل سليم، وتابع معانا هنشرحلك أهم النقاط اللي محتاجة توضيح
1- التقديم بالمعلومات اللي في جواز السفر اسمك واسم العيله وتاريخ ميلادك.
2- ما يهمش أنت عايش فين دلوقت، يعني لو بتشتغل في دولة عربية، أو عايش في مصر، المهم تكون مولود في دولة مافيش عليها حظر من اللوتري.
3- زي ما قلنا الهجرة مبنية علي بلد الميلاد، هتقولي أزاي، يعني لو أنت مصري معاك الجنسية المصرية بس أتولدت في أفغانستان فأنت ممنوع من التقديم إلا بعد خطوات أخرى مش محل شرحها دلوقت، لازم تكون مولود في دولة مسموح الهجرة منها.
4- احذر الأمراض المعدية، النوع ده من الأمراض عائق أكيد لنجاحك في الخطوة دي، يعني لو مريض فيروس سي أو سل لا قدر الله فللأسف في كلام تاني.
.jpg)
5- الدول المؤهلة للهجرة، في بعض الدول زي ما قولنا غير مسموح لها بالهجرة، وفي دول أخرى بيبقى عدد المواطنين اللي سافروا منها السنوات اللي فاتت أكتر من 50 ألف مواطن، الدول دي كمان بيغلق باب التقديم ليها لفترة، علشان اطمنك التقديم لعام 2020 اللي بيتم في الوقت الحالي مسموح الهجرة فيه لكافة الدول العربية، ببساطة قدم وأنت مطمن.
6- السؤال السادس في استمارة التقديم لو أنت مش مولود في أفغانستان ولا إيران ولا كوريا الشمالية مثلا ريح دماغك وسيبه زي ما هو، هو كده تلقائي معمول صح.
7- الصورة ٥ * ٥ خلفيه بيضاء، لو بتفهم شوية في الفوتوشوب دخلها على الفوتوشوب وخليها 600 *600 لو مابتعرفش فيه، كلم حد من صحابك اللي بيعرف يعدلك مقاس الصوره وخدها منه على فلاشة سهلة مش صعبة.
8- عنوان المراسلة، حط عنوانك الحالي حتى لو مسافر، حتى لو الشقة مقفولة، حط لو الشقة باسم والدك ولا زوجتك، العنوان ده مش مهم أساسًا حط العنوان وبس.
9- المراحل التعليمية، أختار أخر شهادة حصلت عليها، يعني لو في ثالثة ثانوي لسه يبقى الشهادة الإعدادية، لو في الجامعة يبقى الثانوية لو بتحضر ماجيستير يبقى الشهادة الجامعية، وهكذا، هتحط شهادة أخر مرحلة تعليمة خلصتها مش المرحلة اللي أنت لسه شغال فيها.
10- التقديم في بدأ فعلا مع بداية شهر أكتوبر 2019 حتي 7 نوفمبر 2020 والنتيجة هتطلع في شهر 5 سنه 2021، يعني أعمل الموضوع وأنساه وما تقلقش وسيبها على الله.
11- خد سكرين شوت عن بياناتك بعد ما تخلص عشان تفتكر التفاصيل، السنة الجاية لو فزت بإذن الله هتملى استمارات تانية لازم تتطابق معلوماتك مع اللي هتكتبه دلوقت، علشان كده خد سكرين شوت من إجاباتك وحطها في ملف وأحفظه على الكومبيوتر واعرف هو فين وأنساه.
12- أطبع رقم الحجز أو اعمله save وشيله معاك، علشان أنت اللي هتستعلم بنفسك بالرقم ده في شهر 5 الجاي إذا كنت فزت ولا لأ.
.png)
في النهاية الفرصة قدامك وبلا مجهود، وتقدر تقتنصها بربع ساعة تقدم فيها الاستمارة، مين عارف يمكن تضرب معاك.
لو محتاج مساعدة أحنا معاك
وأخيرًا لو محتاج مساعدة وعايز حد يملالك الاستمارة مجانًا، بدل الدوخة على أصحابك لتعديل الصورة، أدخل على البوست ده على صفحتنا على الفيسبوك، وأحناه هنساعدك لحد أخر خطوة.
